Uyolihamba uze uliqede izwe, ayikho into ethobisa umuntu njengocansi. Angikhathali noma kungathiwa indoda inolaka olungakanani, kuba khona oyedwa wesifazane ekwaziwayo ukuthi uma esethintwe wuye, kuyashintsha ukwenza kwehle nolaka.
Nabesifazane nabo noma kungathiwa umuntu akangeneki uyaziwa, kuba khona ugalakajana omaziyo ukuthi uthanjiswa kuphi. Kuyona yonke imigilingwane ehlobene nocansi, sengithole ukuthi ukhiye ekuyiwona wona, ukuwotawotana.
eThobisa umuntu njengocansi
Ukulifaka phakathi yinto yokugcina nesingayibiza ngebhonasi.
Intamo: Kungamane kungaphinde kungenelwanwe uma engangiqabuza emqaleni nasezindlebeni bese ehamba engasacobhozanga (Ukucobhoza yisona sigaba sokugcina, iBonus), kusho umngani.
Izindlebe: Uma udlulela ezindlebeni usamgijima ngolimi, ithi uziqabula sakuzikhotha uzimunca kule ndawo engena amacici, uphinde unyenyezele isithandwa sakho amazwi amnandi.
Isisu: Ngezansana kwezimbambo, kwamancane, ayikho indawo emnandi njengokudlaliswa lapho!!! Ngisho kungathiwa awuzazi izithakazelo, uma ubanjwa kwamancane udlaliswa ngolimi sengathi umuntu uyakuqopha, ungagcina uzifundile umthakazele umkhumbuze okhokho bakhe.
Noma ngabe usebenzisa ulimi noma isandla, ngiqinisekisekile kune mizwa enamandla eyafihlwa ezinhlangothini, kuvuka indumiso nomenziwa angakholwa ukuthi kunobumnandi obuvalelwe emzimbeni wakhe uqobo, kuphela nje kumele kube khona ozofika azozamazamisa ichibi kuqubuke uju.
Ungalokothi uyikhohlwe le ndawo uma nidlalisana nesithandwa sakho.
Izandla: Izandla uqobo lwazo (hands). Ingaphandle nengaphakathi lezandla linemizwa ekuthambisa igijimise igazi umzimba wonke. Uma unobuchule bokuqabuza izandla, uzovumelana nami ukuthi “umenziwa ” umqeda amandla avumele intando yakho.
Kumnandi ukwazi umzimba wesithandwa sakho ngaphambili nangemuva. Akumele kube nendawo emzimbeni wothandiweyo wakho, ekukhulunywa ukuthi akaze uyithinte uzame ukuthola ukuthi iqukethe buphi ubumnandi.
Ngithi kini, ningajahi ukulifaka, lokho akube okokugcina. Ubumnandi bonke bulele ekutheni uyihamba kanjani indlela eya eKhenana, uma uhluleke lapho, kungenzeka izwe loju nezinyosi ugcine ngokulikhomba ngezandla.
Amadoda ayehlulwa abesifazane ezintweni eziningi
Indaba yonakala ensimi yase-Eden, ngenkathi uJehova akha indoda ngomfanekiso wakhe yafana naye ncama-shi, yamfuza ngokwenza nangokucabanga.
UJehova esakha owesifazane akathandanga ukuphinda iphutha alenzile ngendoda lokuyenza ifane naye imfuze ibe njengaye. Wabe esebona kungcono ayiphungule, ayicuye indoda bese kuthi ngezicubu zayo akhe owesifazane ukuze indoda ikhothame kowesifazane impilo yayo yonke.
Ngiyazi abangcwele bangase balwisane nami ngaloku kuhumushwa kwezwi kodwa ngibona kunjalo. Emlandweni weBhayibheli abantu besifazane bancishwe udumo namandla ngandlela zonke. Lize lithi iBhayibheli uma besesikhathini abahlanzekile nanoma ubani omthintayo naye uyakungcola kuze kushone ilanga.
Angikho-ke eBhayibhelini ngikuleli qhaza abalidlalayo lokuqumba phansi amadoda.
Amadoda angaba yizidlakela, abe namandla okugudluza intaba kodwa amandla owesifazane asengqondweni ayawedlula awendoda kumbe owesilisa.
Uma ubunganaki, kwenziwa yini izingane zamamantombazane zikhulume kuqala, zicathule kuqala kunezabafana?
Amadoda anohlonze aqunjwe phansi yimbokodo, kwakhona enkolweni esuselwe ngemibhalo yeBhayibheli kuyaye kuqhakanjiswe ukuthi owesifazane kumele alandele emanyathelweni endoda uma eyiganile ngoba kukholelwa ukuthi angeke kulunge ukuthi kube yibo abazokwengamela izinto ekhaya.
NangokweziNtu umama ubalwa nezingane zasekhaya abike konke kumnuzane wekhaya okunguye okhipha isinqumo esingujuqu.
Abantu besimame banethonya lokunqoba amadoda engxoxweni enokuphikisana.
Uma sebekusophile ukwenza into abayithandayo bayaphumelela, noma kungathiwa indoda iyanqaba basebenzisa wonke amaqhinga kugcine bona. Indoda bayimpintshela ekhoneni, ivuze amathe, bayiphulule ikhanda ikhulume izilimu emva kwaloko ubone umuzi wonke ujika ngenxa yomuntu wesifazane.
Kuningi engiyaye ngikuzwe kuxoxwa ngamadoda ngabantu besifazane, uzwe umuntu ethi mina kwami ngeke umfazi enze ukuthi, mina intombi yami ngeke ikwenze ukuthi, uyothi uyabona ziwadla ebhekile kwakhe…sekwenzenjani?
Umuntu wesifazane unethonya lokwahlula indoda, uma uyindoda engafuni ukwahlulwa unkosikazi wayo kumbe yintombi yayo ugcina ufana nathi nje esizimpohlwa.
Empilweni yami angilithandi ibhulukwe kumuntu wesifazane, kodwa ngisahlulekile ukubakhumula ibhulukwe bonke engike ngazana nabo. Angizifuni izinwele zemifakela kodwa ngisahlulekile ukuyilwa ngempumelelo leyo ndaba.
Iyanginenga eyalolu bhuqu abalugcoba ebusweni, namashiya adwetshiwe kodwa ngisahlulekile ukubayekisa lo mkhuba esebedlule kwezami izandla.
Kuningi ekukhalwa ngakho emhlabeni, ngicabanga ukuthi iqhaza lokubumba isizwe lisezandleni zabantu besifazane abazosehlula ngezinto ezinhle ezakhayo. Abake basehlule ngokuqopha umlando wokungaqomi, baqophe umlando ngokungazali bengaganile.
Baqophe umlando ngobuntombi-nto, baqophe umlando ngokuzihlonipha nangokuhlonipha, ke baqophe umlando ngokuzithoba, ngokulwela izinto ezakhayo ezizovusa imizi yobaba, siganwe sizishaye isifuba ngabafazi bethu, hhayi salokhu siqedela izichibi ezisale kade kuphuziswa ibandla lidlula ngendlela.
Nanamuhla ngiyakholwa ukuthi ikhambi lokuqeda nya lo mkhuba womahlabadlule njengenaliti emadodeni amaningi lisezandleni zamantombazane. Uma umuntu ekweshela sekwacaca kudala ukuthi kushelwa ngamanga nobuciko bokuphemba uthando, nqaba-ke ntombi ukuholelwa ophathe.
Tshela isesheli sakho uyintombi yakwenu uthi awulifuni hhayi uloku uthi “hhayi kunomuntu engimqomile” ngoba intombi ikhishwa kanjalo esokeni. Nqaba ukuqoma ngenkomo ungashelwanga, shelwa, uqinisekise ukuthi uyamchazela ukuthi umqomelani mhla umqoma ngoba kungenjalo uzofohla isibaya sikayihlo maqede agelekeqeke!
0 Comments